Илон Маск планира од следната година да подари по една акција од својата компанија „Спејсекс“ на секое дете во Соединетите Американски Држави. Бидејќи во земјата живеат околу 72 милиони деца, вкупната вредност на најавената поделба би можела да достигне 10,5 милијарди долари.

Маск ја објави својата намера на социјалната мрежа Икс, најавувајќи дека ова ќе биде „прва од многуте“ слични иницијативи. Засега, сепак, не открил како ќе се распределуваат акциите, ниту под кои услови децата ќе можат да располагаат со нив.

Инвестиции за децата во САД

Како што пишува „Верџ“, најавата на Маск доаѓа неколку месеци откако претседателката на „Спејсекс“, Гвин Шотвел, објави дека ќе донира свои акции во компанијата за два милиона инвестициски сметки наменети за деца, познати како „Трамп акаунтс“ (Trump Accounts).

Станува збор за инвестициски сметки со даночни поволности, наменети за американските деца. Иницијативата веќе доби поддршка и од други познати бизнисмени.

Основачот на „Дел“, Мајкл Дел, најави издвојување 6,25 милијарди долари, додека производителот на мемориски чипови „Микрон“ најави инвестиција од 250 милиони долари.

Маск издвојува милиони и за политички активности

Покрај најавената поделба на акции, Маск во последните месеци издвојува значителни средства и за политички активности во САД.

Во септември, според написот, тој донирал 158 милиони долари на организацијата „Сенат лидершип фанд ПАК“, која ги поддржува републиканските кандидати. Со тоа, наводно, обезбедил повеќе од половина од нејзините приходи во третиот квартал.

Дополнителни 76 милиони долари уплатил во „Америка ПАК“, политичка организација што самиот ја основал во 2024 година.

Засега останува нејасно како точно би се спровела најавената поделба на акциите од „Спејсекс“ и дали ќе бидат утврдени посебни услови за нивно поседување и користење од страна на малолетниците.