Најмалку 2,6 милиони долари исчезнаа од сметките на корисниците на Polymarket, откако хакери искористија технички пропуст во надворешна алатка интегрирана на платформата. Дигиталната берза за прогнозирање настани привремено го прекина тргувањето за да го изолира упадот. Нападот директно погоди повеќе од 700 поединечни сметки, отворајќи нови прашања за безбедносните стандарди на децентрализираните финансиски сервиси кои масовно ги користат и помладите генерации дигитални трговци.

Упадот не настанал преку директна дупка во основниот код на Polymarket, туку преку компромитација на DebugBear, надворешна софтверска алатка за следење на брзината и перформансите на веб-страницата. Напаѓачите вметнале скрипта дизајнирана автоматски да ги продава отворените позиции на корисниците и да ги префрла средствата на непознати дигитални паричници.

Polymarket го пријави случајот до полицијата во Обединетото Кралство, каде што се наоѓа седиштето на DebugBear. Британската компанија потврди дека се соочува со активен безбедносен инцидент и упати апел до сите свои клиенти веднаш да го отстранат нејзиниот софтверски код од своите сервери.

Анализата на трансакциите на сомнителниот дигитален паричник на блокчејнот покажува брзо повлекување на повеќе од 2,5 милиони долари. Хакерите успеале да извлечат средства од над 700 индивидуални сметки пред берзата да реагира со запирање на сите трансакции.

Платформата, која стекна огромна глобална популарност со обложувањето на исходот од претседателските избори во САД и геополитичките превирања, најави дека сите оштетени корисници ќе добијат целосна компензација за изгубените средства.

Компанијата најави дека системот е целосно исчистен од спорниот код и дека сите функционалности на берзата постепено се враќаат во нормала.