Брзото намалување на кислородот во светските океани, езера и реки ја турка Земјата кон небезбедна зона, со последици што се иреверзибилни во временска рамка соодветна за човекот. Ова е главното предупредување од новата научна студија предводена од Институцијата за океанографија „Скрипс“ при Универзитетот во Калифорнија, Сан Диего. Научниците бараат деоксигенацијата на водите итно да се вклучи како десетти критичен процес во официјалната рамка на планетарни гранични вредности.

Губењето на кислородот во водните средини не се случува изолирано. Истражувањето објавено во списанието Limnology and Oceanography покажува дека овој процес директно влијае врз сите преостанати девет планетарни гранични вредности, вклучително и климатските промени, зачувувањето на биодиверзитетот и океанската киселост.

Примарни причина за оваа деоксигенација се затоплувањето предизвикано од човечките активности, прекумерното загадување со хранливи материи и промените во циркулацијата на подлабоките водени слоеви. Кога кислородот опаѓа, се нарушуваат фундаменталните хемиски и биолошки циклуси што ја одржуваат стабилноста на биосферата.

Последиците од недостигот на кислород се чувствуваат низ сите нивоа на водниот свет, од микроскопски организми до големи риби и ајкули. Иако морските цицачи дишат воздух на површината, тие се исто така загрозени бидејќи губењето на кислородот драматично ги менува нивните живеалишта и достапноста на нивниот плен.

Идејата за овој научен труд произлезе од климатската конференција на Обединетите нации во Мадрид (COP25), кога авториге водени од екологот Ерика Ферер и биолошката океанографка Лиза Левин увидоа дека прашањето за кислородот е запоставено во глобалните политики. Научниците апелираат креаторите на политики итно да ги земат предвид овие откритија при дефинирањето на глобалните стратегии за заштита на животната средина.