Претседателката на Европската комисија, Урсула фон дер Лајен, денеска ја заврши дводневната посета на Нук, каде што најави инвестициски пакет од 200 милиони евра за Гренланд. Фон дер Лајен порача дека автономијата во состав на Кралството Данска треба да остане цврсто врзана за Брисел, испраќајќи директен политички одговор по месеците во кои американскиот претседател Доналд Трамп јавно го мереше интересот на Вашингтон за преземање на стратешкиот арктички остров.
Европските 200 милиони евра се наменети за конкретни развојни програми на островот, потврдија официјалните претставници на прес-конференцијата во главниот град Нук. Фон дер Лајен нагласи дека Унијата донела стратешка одлука да биде многу поактивна во арктичкиот регион, што директно го менува досегашниот пасивен однос на Брисел кон оваа територија.
„Европа донесе одлука: да биде поприсутна и поангажирана на Гренланд и на Арктикот“, рече Фон дер Лајен. Во текот на целата посета таа повторуваше дека Гренланд мора да остане со Европа, а не со Соединетите Американски Држави, пренесува Франс прес.
За локалната влада во Нук, овие средства значат економски поттик без потреба да се влегува во финансиски аранжмани со други глобални сили кои покажуваат амбиции кон нивните природни ресурси.
Посетата на претседателката на Европската комисија следи по дипломатските потреси што избија на почетокот на годинава, кога Доналд Трамп одново ја актуализираше идејата САД да го преземат Гренланд. За време на јавните настапи, Трамп првично одбиваше да ја исклучи дури и употребата на воена сила, што предизвика сериозен револт во Копенхаген и во европските метрополи.
Тензиите делумно се спуштија на 21 јануари, кога Трамп на Светскиот економски форум во Давос изјави дека нема да употреби сила. Сепак, неговата администрација не испрати сигнал дека целосно се откажала од намерата да воспостави контрола врз ова стратешко подрачје, богато со минерали и клучни поморски патишта.
Без директно да го спомене Трамп по име, шефицата на Комисијата подвлече црвена линија околу политичкиот статус на островот: „За иднината на Гренланд одлучуваат жителите на Гренланд и Данска. Никој друг.“
Гренландскиот премиер Јенс-Фредерик Нилсен и данската премиерка Мете Фредериксен застанаа зад истиот став. На заедничката прес-конференција двајцата лидери истакнаа дека соработката не е еднонасочна помош, нагласувајќи дека на Гренланд му треба Европската унија, но и дека на Европската унија и те како ѝ треба Гренланд, особено во екот на глобалната битка за влијание врз Арктикот.
