Со падот на надворешните температури и сè потоплите радијатори во домовите, повеќето луѓе размислуваат како да го затоплат просторот и да ја задржат топлината. Но, додека се сместуваме удобно со телефонот во рака, ретко помислуваме дека и омилениот уред може да трпи последици од температурните промени.

Оставањето на телефонот покрај радијатор или греалка може да предизвика прегревање и да го забрза трошењето на батеријата. Особено неповолно е ако уредот се полни на топло место, бидејќи дополнителното загревање може да го забави или целосно да го прекине полнењето.

Греењето, жешките радијатори и наглото преминување од студена во претопла средина можат да влијаат врз работата на паметните телефони, а особено врз нивните батерии.

Радијаторот не е место за телефонот

Проблемот настанува кога уредот се наоѓа непосредно до извор на топлина. Ако телефонот остане на прозорската даска над радијаторот, на полица веднаш до греалка или на маса изложена на директен топол воздух, неговата температура може да го надмине препорачаниот опсег. Особено е ризично ако ваквото изложување се повторува секојдневно.

Гугл во безбедносните упатства за телефоните „Пиксел“ предупредува дека уредите не треба да се оставаат во близина на отвори за греење, бидејќи прекумерната топлина може да го оштети телефонот и да ја прегрее батеријата.

Батеријата е најчувствителниот дел од телефонот

Повеќето современи паметни телефони користат литиум-јонски батерии, чиј капацитет природно се намалува со текот на времето. Високите температури можат да го забрзаат овој процес, па батеријата по одреден период може да почне да се празни побрзо од порано.

Тоа значи дека телефонот што претходно без проблем издржувал цел ден, со текот на времето може сè почесто да бара полнач. Сепак, тоа не значи дека телефонот што еднаш ќе се најде покрај радијатор веднаш ќе се расипе. Современите уреди имаат вградени системи за заштита што ја следат температурата и се обидуваат да спречат прегревање. Но, тоа не е причина намерно да ги изложуваме на топлина.

„Епл“ предупредува дека долготрајната употреба на уредите во многу топли услови може трајно да го скрати животниот век на батеријата.

Полнењето покрај радијатор е особено лоша идеја

Дополнителен проблем се појавува кога телефонот истовремено се полни и се наоѓа на топло место. За време на полнењето батеријата природно создава одредена количина топлина, а дополнителното загревање од околината може да ја влоши ситуацијата.

Ако корисникот во исто време гледа видеа, игра игри или користи апликации што бараат поголема процесорска моќ, уредот има уште поголемо оптоварување и дополнително се загрева. „Хуавеј“ во своите упатства советува телефонот да се полни на рамна површина со добра циркулација на воздухот, а не на кревет или кауч.

Кога телефонот ќе процени дека температурата е превисока, може автоматски да го забави или целосно да го прекине полнењето. Кај одредени уреди екранот може да ја намали осветленоста, апликациите да работат побавно, а некои функции привремено да станат недостапни.

На ајфон уредите корисникот може да добие и известување дека полнењето е запрено додека телефонот не ја достигне соодветната температура. Тоа не е дефект, туку заштитна функција што спречува посериозни последици.

Наглата промена од студено во топло може да создаде кондензација

Не е само топлината од радијаторот проблем. Во студените денови телефоните често минуваат низ големи температурни промени. Замислете уред што неколку часа стоел во студен автомобил, а потоа го внесувате во топол стан во кој работат радијаторите. Наглата промена на температурата може да предизвика кондензација, односно создавање ситни капки влага на телефонот, но и во неговата внатрешност.

Тука се појавува дополнителен ризик. Влагата што ќе навлезе во телефонот може да ги загрози електронските компоненти, да предизвика проблеми со приклучоците и да доведе до дефект.

Дури и телефоните со ознака за отпорност на вода не се целосно заштитени од сите облици на влага и кондензација. Затоа е важно уредот да не се изложува на нагли температурни промени, туку постепено да се приспособи на новата средина.

Неколку навики што можат да ја зачуваат батеријата

Упатствата на производителите содржат неколку едноставни правила што вреди да ги следите:

• Не го оставајте телефонот на радијатор, покрај греалка или на место каде што директно струи топол воздух.
• Додека се полни, поставете го на цврста, рамна и сува површина, подалеку од извори на топлина.
• Не го полнете под перница, ќебе или на кауч, бидејќи на таквите места топлината потешко се ослободува.
• Ако го внесете од многу студен простор, оставете го постепено да се загрее до собна температура пред да го приклучите на полнач.
• Ако забележите влага на куќиштето или екранот, почекајте уредот целосно да се исуши.
• Не го ставајте на радијатор и не користете фен за побрзо да го загреете или исушите.

Која температура е безбедна за телефонот?

„Епл“ за ајфон и ајпед уредите препорачува температура на околината од 0 до 35 степени Целзиусови за време на употреба. Гугл го наведува истиот опсег и за телефоните „Пиксел“.

Тоа значи дека вообичаено загреан стан сам по себе не е проблем. Ризикот настанува кога телефонот е изложен на директен извор на топлина, што може да предизвика температурата на самиот уред да стане значително повисока.

Затоа, не е доволно само да процениме дали нам ни е пријатно во просторијата, туку важно е и каде го оставаме телефонот.

Додека во студените денови сè повеќе време поминуваме во загреани домови, на телефоните им треба малку поинакво место за одмор. Наместо на радијатор или веднаш до него, оставете ги на обична работна маса, подалеку од изворите на топлина. Оваа мала промена во навиките може да помогне батеријата подолго да го задржи капацитетот, а уредот да избегне непотребно загревање и проблеми со влагата.