Германски суд донесе одлука во корист на потрошувачите во случајот со чоколадите Milka, откако производителот ја намалил тежината на дел од производите од 100 на 90 грама, а пакувањето останало речиси непроменето. Судот во Бремен оцени дека ваквата практика може да ги доведе купувачите во заблуда и претставува прекршување на правилата за конкуренција.

Според пресудата, чоколадите од 90 грама не смеат да се продаваат во исто пакување доколку претходно во период од четири месеци се нуделе верзии од 100 грама. Иако одлуката сè уште не е правосилна и постои можност за жалба, судот нагласи дека случајот е важен за идни слични практики на пазарот.

Судот посочи дека разликата во тежината е речиси незабележлива, бидејќи новите чоколади се само околу еден милиметар потенки, додека дизајнот на пакувањето останал скоро идентичен. Организациите за заштита на потрошувачите сметаат дека станува збор за пример на таканаречена „шринкфлација“, кога производите се намалуваат, а цената и изгледот остануваат исти.

Од компанијата Mondelez, сопственик на брендот Milka, соопштија дека ја анализираат судската одлука и дека ќе продолжат транспарентно да ги информираат потрошувачите. Тие тврдат дека тежината на производите била јасно означена на пакувањето.

Случајот привлече големо внимание во Германија и Европа, бидејќи ваквите практики стануваат сè почести во време на растечки трошоци и инфлација. Експертите сметаат дека пресудата може да влијае и врз други производители кои применуваат слични промени кај своите производи.