Во студиото FAME’S во Скопје се снима оригиналната музика за „Слушни ме“, музички  документарен филм за Марко Маринковиќ – Слаткаристика и неговиот личен пат со  пелтечењето. 

 Музиката за филмот, на кој поголем дел е автор Лазар Цветковски, ја изведува оркестар  составен од млади музичари од различни европски земји и пошироко, учесници на  Институтот FAME’S. Институтот е основан во 2021 година од страна на FAME’S ДОО, една од  водечките европски компании за оркестарски снимања за филмската, телевизиската и  гејминг-индустријата. Институтот им овозможува на млади класични музичари од цела  Европа да посетуваат мастеркласови со реномирани интернационални музичари, ментори  и диригенти. Нивната мисија е да го модернизираат класичното музичко образование  преку негово поврзување со актуелните индустриски трендови и современите музички  жанрови, со фокус на напредни студиски техники, истовремено поттикнувајќи соработка во  културниот и образовниот сектор. 

 На снимањето присуствуваше и Марко Маринковиќ – Слаткаристика кој го следеше целиот  процес на создавање. „Пресреќен сум што имам можност своите песни да ги слушнам  во една ваква оркестарска изведба. За мене ова е навистина посебен момент –  музиката што е дел од мојата приказна добива нов живот, нова емоција и поинаква  сила“, изјави тој. 

 Снимањето се реализира во рамките на соработката меѓу Продукциската куќа на филмот  и Институтот, преку проектот „Европски креативен оркестарски програм за квалификувани  млади“, поддржан од програмата „Креативна Европа“, Министерството за култура на  Република Македонија и FAME’S ДОО. Младите музичари, како дел од Семинар 14 и курсот  Hybrid Music Orchestral Course, добиваат можност да учествуваат во современа филмско-музичка продукција и да стекнат практично искуство во професионално студиско снимање. 

„Институтот FAME’S е простор во кој младите европски музичари учат преку  реален професионален процес. Кога музика напишана за филм ќе дојде во студио,  композицијата, оркестрациите и партитурите за првпат добиваат целосен живот  преку оркестарската изведба. Особено ни е значајно што едно вакво светски  признаено студио функционира во Скопје и што сме дел од создавањето на  оригинална музика за македонски филм со силна општествена и инклузивна порака“,  изјави Стефан Ношпал од FAME’S. 

 FAME’S за потребите на снимањето обезбеди професионално студио, простории за проби,  оркестар, диригент, тон-мајстор и целосна техничка опрема. Ваквиот процес им  овозможува на младите музичари да се запознаат со сите фази на создавањето филмска  музика, од подготовката на партитурите и оркестарските проби до финалното студиско  снимање. 

 Филмот „Слушни ме“ го следи патот на Марко Маринковиќ – Слаткаристика, од  несигурностите во детството до создавањето автентичен глас кој денес инспирира  многумина. Преку лични сведоштва, музика, работилници со деца и играни сегменти од  неговиот живот, филмот зборува за пелтечењето, прифаќањето на различностите,  храброста, упорноста и силата на уметноста. 

 Режисер на филмот е Раша Петровиќ, сценарист е Кристина Ризоска, а филмот е  создаден според идеја и вистинита приказна на Марко Маринковиќ – Слаткаристика.  „Слушни ме“ е во копродукција на ОХО Продукција и Иноватива Груп, а неговата  премиера се очекува на почетокот на 2027 година.