Сè поголем број граѓани на Европската Унија не ги сметаат САД за сигурен и доверлив партнер, покажува ново истражување спроведено во сите 27 земји членки на ЕУ. Анализата на Фондацијата „Бертелсман“ укажува дека политиките на американскиот претседател Доналд Трамп значително влијаеле врз ставовите на Европејците.
Истражувањето било спроведено во март, а во него учествувале повеќе од 18.000 лица на возраст од 18 до 69 години. Дури 58 проценти од анкетираните сметаат дека САД повеќе не се доверлив партнер на Европската Унија. Во Германија недовербата е уште поизразена, каде 73 проценти од испитаниците имаат таков став.
Воедно, само 31 процент од граѓаните ги гледаат САД како најважен партнер на ЕУ, што претставува значителен пад во споредба со септември 2024 година, кога тој процент изнесувал 51.
Истражувањето покажува и дека мнозинството Европејци сакаат Унијата да води понезависна политика. Околу 73 проценти од испитаниците сметаат дека Европа треба да „оди по свој пат“, наместо да се потпира на долгогодишното блиско партнерство со Вашингтон.
Иако расте дистанцата кон САД, граѓаните на ЕУ не ја гледаат Кина како сериозна алтернатива. Скептицизмот кон Пекинг останува висок, додека Велика Британија и Канада се издвојуваат како посакувани стратешки партнери.
Поддршката за НАТО и понатаму останува силна. Според студијата, 63 проценти од испитаниците Алијансата ја сметаат за клучен столб на европската безбедност.
