Европската Унија во 2025 година остварила трговски суфицит од 32,4 милијарди евра во размената на високотехнолошки производи. Увозот изнесувал 534,1 милијарда евра, додека извозот достигнал 566,5 милијарди евра. Според податоците објавени од хрватскиот технолошки портал „Мрежа“, позитивниот биланс доаѓа по четири последователни години трговски дефицит, од 2020 до 2023 година, а ова е втора година по ред во која ЕУ бележи суфицит во овој сектор.

Во изминатата деценија и увозот и извозот бележеле раст. Од 2015 година увозот на високотехнолошки производи се зголемувал во просек за 6 проценти годишно, односно вкупно за 239,9 милијарди евра. Извозот растел побрзо, со просечна годишна стапка од 7 проценти и вкупно зголемување од 265,4 милијарди евра. Во 2025 година ЕУ произвела високотехнолошки производи во вредност од 532 милијарди евра, речиси двојно повеќе отколку во 2015 година, кога производството изнесувало 287 милијарди евра.

Кина и САД се главни извори на увоз

Повеќе од половина од увозот на високотехнолошки производи во ЕУ во 2025 година дошол од Кина и САД. Кина учествувала со 28 проценти, односно 150,4 милијарди евра, додека од САД биле увезени производи во вредност од 131,4 милијарди евра, што претставува 25 проценти од вкупниот увоз. На третото место е Швајцарија, со удел од 6 проценти и извоз кон ЕУ во вредност од 32,6 милијарди евра.

Структурата на увозот се разликува во зависност од земјата. Од Кина најмногу се увезувале електроника и телекомуникациска опрема, кои сочинувале 48 проценти од увозот од таа земја, како и компјутери и канцелариски машини, со удел од 31 процент. САД главно испорачувале воздухопловни и фармацевтски производи, кои сочинувале 36, односно 33 проценти од увозот од оваа земја. Кај Швајцарија доминирале фармацевтските производи, со удел од дури 71 процент.

САД се најголемиот пазар за европскиот извоз

САД биле убедливо најголемата извозна дестинација за високотехнолошките производи од ЕУ во 2025 година. Во оваа земја биле извезени производи во вредност од 195,1 милијарда евра, што претставува 34 проценти од вкупниот извоз на ЕУ во оваа категорија. На второто место е Обединетото Кралство со 52,5 милијарди евра, односно 9 проценти, а потоа следува Кина со 48,1 милијарда евра и удел од 8 проценти.

Европскиот извоз во САД главно се потпирал на фармацевтски производи, кои сочинувале 62 проценти од вкупната вредност на високотехнолошкиот извоз во оваа земја. Воздухопловните производи имале удел од дополнителни 12 проценти. Извозот во Обединетото Кралство бил поразновиден: фармацевтските производи учествувале со 23 проценти, воздухопловните производи и електрониката и телекомуникациската опрема со по 19 проценти, а научните инструменти со 13 проценти.

Слична разновидност имало и во извозот кон Кина. Електрониката и телекомуникациската опрема сочинувале 30 проценти од високотехнолошкиот извоз во оваа земја, воздухопловните производи 27 проценти, научните инструменти 20 проценти, а фармацевтските производи 13 проценти.