Епидемијата на ебола во Демократска Република Конго продолжува да се шири со загрижувачко темпо, а според најновите податоци бројот на потврдени случаи надмина 5.500.

Европскиот центар за превенција и контрола на болести објави дека до 23 август во земјата биле регистрирани 5.514 потврдени случаи и 2.642 смртни случаи. Само во периодот опфатен со последното ажурирање биле пријавени 55 нови случаи и 36 смртни случаи. 

Најтешко погодена е провинцијата Итури, каде се регистрирани 4.607 случаи и 2.065 смртни случаи. Случаи има и во Северно Киву, Јужно Киву, О-Зеле и Чопо.

Станува збор за епидемија предизвикана од вирусот Бундибугио, поретка форма на вирусот ебола. Светската здравствена организација претходно предупреди дека актуелната епидемија веќе го надминала бројот на случаи од големата епидемија во Конго од 2018 до 2020 година и претставува најголемата епидемија на ебола досега забележана во земјата. 

Болниците и здравствените работници под огромен притисок

Контролата на епидемијата е дополнително отежната од безбедносната состојба во источниот дел на земјата. Нападите врз здравствените установи и тимовите што работат на терен го ограничуваат пристапот до погодените подрачја и го отежнуваат следењето на контактите.

Според СЗО, најмалку 155 здравствени работници биле заразени од почетокот на епидемијата, а 45 од нив починале. 

Здравствените власти се соочуваат и со отпор од дел од населението, недоверба кон институциите и проблеми со изолацијата на пациентите. Сето тоа создава услови за понатамошно ширење на вирусот.

Вакцина постои, но со голема неизвесност

Дополнителен проблем е тоа што за вирусот Бундибугио во моментов нема одобрена вакцина или специфичен третман. Во Конго сепак пристигнаа повеќе од 16.000 дози од вакцината Ервебо, која е развиена за друг вид на вирусот ебола. СЗО планира нејзино користење во клинички испитувања за да се утврди дали може да обезбеди заштита и против актуелниот вид. 

СЗО предупредува дека епидемијата е во критична фаза и дека потребни се засилени напори за откривање на новите случаи, следење на контактите, изолација и заштита на здравствените работници.

Со повеќе од 5.500 потврдени случаи и над 2.600 смртни случаи, актуелната епидемија веќе е најтешката епидемија на ебола во историјата на Демократска Република Конго.