Американските власти продолжуваат со ограничувањата за патниците кои престојувале во Демократска Република Конго, Уганда и Јужен Судан. Наредбата, издадена на 13 јули, ќе важи наредните 30 дена и претставува веќе трето продолжување на мерката воведена првично во мај.

Според оваа одлука, странски државјани кои биле во тие земји во последните 21 ден засега не можат да влезат во САД. Американските државјани сепак смеат да патуваат дома, но по влез поминуваат низ засилена здравствена проверка на еден од неколку одредени аеродроми.

Мерките првично беа воведени на 18 мај оваа година и оттогаш редовно се продолжуваат секој месец, во услови кога епидемијата во Конго продолжува да расте наместо да стивнува.

Најновите податоци на Европскиот центар за контрола на болести, ажурирани на 12 јули, покажуваат вознемирувачка слика: 1.926 потврдени случаи на ебола, од кои 702 се завршиле со смрт. Дополнителни 753 пациенти во моментов се хоспитализирани во изолација, додека бројката продолжува да расте од ден на ден.

Зад епидемијата стои вирусот Бундибуѓо, еден од четирите видови на вирусот ебола. Најтешко погодена останува провинцијата Итури, во североисточниот дел на земјата, каде што епидемијата и започна.

Меѓу заразените е и американски лекар, кој работел за хуманитарна организација во градот Буниа. Позитивен на вирусот бил тестиран на 10 јули, а само три дена подоцна бил медицински евакуиран во Германија на лекување. Ова не е првиот ваков случај, уште еден Американец беше евакуиран во Германија во мај, додека во Франција на 24 јуни беше пријавен сличен случај.

Вирусот ебола најчесто се пренесува преку директен контакт со телесни течности на заразени луѓе или животни. Болеста почнува со висока температура, слабост, повраќање и дијареа, а во потешките случаи доведува и до внатрешно и надворешно крвавење.