Македонскиот режисер Дарко Митревски се враќа во земјава по 14 години отсуство за да одржи провокативен мастерклас на претстојниот филмски фестивал „Браќа Манаки“ во Битола. Авторот на култните филмови „Балканкан“ и „Трето полувреме“ на програмата од 19 до 25 септември ќе сподели сценаристички искуства и занаетчиски решенија пред помладата генерација филмаџии.

Мастеркласот насловен „Како да НЕ снимите здодевен филм?“ е замислен како практична презентација на раскажувачки техники кои го задржуваат вниманието на публиката од античката драма до денешниот Холивуд. Митревски отворено порачува дека во филмската уметност не постои недостиг на инспирација, туку незнаење и мрза кои се совладуваат со мајсторско владеење на алатите.

На пошироката јавност Митревски и е дефинитивно познат по двата најгледани македонски филма во современата историја. Црната комедија „Балканкан“ освои 150.000 кино влезници и 20.000 ДВД копии, додека фудбалскиот еп „Трето полувреме“ привлече над 90.000 гледачи во домашните сали. Неговите остварувања се прикажале на стотина фестивали низ светот, од Москва и Лондон до Токио и Каиро.

Покрај домашниот ангажман, режисерот неодамна потпиша договори во САД за реализација на две нови сценарија. Паралелно, американската куќа „Vinegar Syndrome“ објави луксузно блуреј реиздание на неговиот филмски првенец „Збогум на дваесетиот век“, кој го потпиша заедно со Александар Поповски.