Европската комисија ќе предложи отворање постапка за прекумерен дефицит против Бугарија, откако оцени дека земјата не ги исполнува фискалните критериуми на Европската Унија.

Еврокомесарот за економија Валдис Домбровскис изјави дека Комисијата ја разгледала буџетската состојба на неколку земји членки и заклучила дека Бугарија не ги исполнува условите поврзани со буџетскиот дефицит.

Постапката за прекумерен дефицит е механизам на ЕУ со кој се следи дали земјите членки ги почитуваат договорените фискални правила. Според тие правила, буџетскиот дефицит не треба да надмине 3 проценти од БДП, а јавниот долг треба да остане под 60 проценти од БДП.

Европската комисија на 6 јуни усвои извештај за Бугарија, Германија, Естонија, Латвија и Словенија, со цел да оцени дали овие земји го почитуваат критериумот за дефицит.

Доколку Советот на ЕУ ја прифати препораката, Бугарија ќе добие рок и препораки за мерки со кои треба да го врати дефицитот во дозволените граници. Финансиски санкции не следуваат автоматски, но се можни ако земјата не ги спроведе препораките.

Предлогот на Европската комисија сега треба да биде разгледан од земјите членки на Европската Унија како дел од понатамошната процедура.