По најавата дека САД ќе повлечат околу 5.000 војници од Германија во следните шест до дванаесет месеци, Берлин порача дека Европа мора побрзо да ја преземе одговорноста за сопствената безбедност и да ја зајакне својата одбранбена способност.
Германскиот министер за одбрана Борис Писториус изјави дека европските земји треба да преземат поголема одговорност за својата безбедност, оценувајќи дека повлекувањето на дел од американските сили било очекувано. Тој нагласи дека Германија веќе работи на проширување на Бундесверот, побрза набавка на воена опрема и развој на потребната инфраструктура.
Пентагон ја потврди одлуката за намалување на американското воено присуство во Германија, каде што се распоредени десетици илјади американски војници. Според Асошиејтед прес, повлекувањето на 5.000 војници претставува околу 14 проценти од американските сили во Германија.
И покрај пораката дека Европа мора да се потпре повеќе на сопствените капацитети, Писториус нагласи дека американското воено присуство во Европа, особено во Германија, останува заеднички интерес и за европските сојузници и за Соединетите Американски Држави. Германија е една од најважните точки на американското воено присуство во Европа, со клучни бази и инфраструктура за НАТО.
Од НАТО соопштија дека работат со Вашингтон за да ги разберат деталите од одлуката, но и дека ваквиот развој повторно ја нагласува потребата Европа да вложува повеќе во одбраната и да преземе поголема улога во заедничката безбедност.
Одлуката доаѓа во период на зголемени тензии во трансатлантските односи и во момент кога европските членки на НАТО се под притисок да ги зголемат воените буџети. Иако политичката порака од Берлин е јасна, европските земји се соочуваат со сериозен предизвик: зајакнувањето на одбранбените капацитети бара време, пари и долгорочна политичка согласност.
