Повеќе од половина од Германците очекуваат канцеларот Фридрих Мерц да ја напушти функцијата пред следните редовни сојузни избори, планирани за 2029 година, покажува ново истражување на YouGov. Според анкетата, 54 отсто од испитаниците сметаат дека Мерц нема да го дочека крајот на актуелниот мандат.
Од нив, 36 отсто очекуваат тој да остане канцелар во текот на 2026 година, но да се повлече пред изборите во 2029 година. Дополнителни 18 отсто сметаат дека ќе биде заменет уште пред крајот на оваа година. Од друга страна, 29 отсто очекуваат Мерц да остане на функцијата најмалку до следните редовни избори, додека 17 отсто не знаеле или не сакале да одговорат.
Анкетата покажува и сериозно незадоволство од неговиот авторитет во сопствената партија. 36 отсто од испитаниците сметаат дека Мерц изгубил многу од авторитетот во Христијанско-демократската унија (CDU), додека 31 отсто оцениле дека изгубил дел од влијанието. Само 1 отсто сметаат дека неговиот авторитет значително се зголемил, а 5 отсто забележале мало зголемување.
Интересно е и прашањето кој би бил подобар избор за германски канцелар. 25 отсто од анкетираните го посочиле Хендрик Вист, премиер на Северна Рајна-Вестфалија и член на CDU. За Мерц се определиле само 9 отсто, додека дури 66 отсто не знаеле кого би избрале. Истражувањето на YouGov било спроведено од 14 до 17 август, на примерок од 2.091 гласач со право на глас, по нарачка на германската новинска агенција dpa.
Резултатите покажуваат дека, иако Мерц е актуелен канцелар, значителен дел од германската јавност веќе очекува промена на лидерството пред истекот на мандатот.
