Центарот за современи уметности Скопје утревечер во 20:00 часот во Мобилната/Монтажна галерија во Паркот на Франкофонијата ја отвора самостојната изложба „Homo archīvālis“ на уметницата Анастасија Саздовска. Проектот претставува истражување на традиционалните балкански тетоважи и македонските народни везови, реконтекстуализирани преку дигитални колажи и дела во комбинирана техника кои го третираат женското тело како телесна архива на колективната меморија.

Насловот на изложбата „Homo archīvālis“ е авторска кованица од латинските зборови homo (човек) и archīvālis (архивски), со која Саздовска го дефинира човекот како телесна архива на записи. Инспирацијата произлегува од традиционалното тетовирање на Балканот и богатата орнаментика на македонскиот вез. Овие мотиви не се третирани како декорација, туку како историски форми преку кои заедниците го изразувале својот идентитет, верувања и припадност во услови на ограничувања.

Основниот фокус на проектот е ставен врз улогата на жената како главен чувар и пренесувач на оваа традиција. Согледано низ современа дигитална и комбинирана ликовна техника, женското тело станува простор во кој се зачувуваат вредностите на заедницата. Преку овие визуелни записи, изложбата го истакнува историскиот отпор и зачувувањето на достоинството на колективот.

Проектот е финансиски поддржан од Министерството за култура и туризам на РСМ и Општина Центар.