Американската администрација објави прв пакет претходно доверливи документи за неидентификувани аномални појави, познати во јавноста како НЛО, во рамки на поширока иницијатива за поголема транспарентност.
Администрацијата на американскиот претседател Доналд Трамп објави прв пакет декласифицирани државни документи поврзани со неидентификувани аномални појави, попознати како НЛО. Материјалите вклучуваат видеа, фотографии и службени документи, а се објавени преку нов интернет-портал посветен на оваа тема. Објавата доаѓа во период на зголемен јавен и институционален интерес во САД за тоа што државата знае за ваквите случаи и кои информации досега биле недостапни за јавноста.
Објавувањето беше најавено од американското Министерство за одбрана, во рамки на програмата „Пурсју“ – меѓуресорски проект во кој учествуваат Белата куќа, Канцеларијата на директорот на националното разузнавање, НАСА, Федералното истражно биро, Министерството за енергетика и Канцеларијата на Пентагон за решавање аномалии во сите домени.
Според соопштението, новодекласифицираните материјали опфаќаат видеозаписи, фотографии и државни документи кои досега не биле јавно достапни. Американската администрација најави дека ова е само прв пакет и дека дополнителни документи поврзани со НЛО ќе бидат објавувани постепено.
Одлуката, како што наведуваат американските власти, следи по наредбата на претседателот Трамп за почнување процес на декласификација на записите поврзани со НЛО, „во интерес на целосна транспарентност“.
Американскиот секретар за одбрана Пит Хегсет изјави дека документите долго време биле скриени од јавноста и дека токму тоа со години поттикнувало шпекулации. Директорката на националното разузнавање Тулси Габард посочи дека американските разузнавачки служби спроведуваат обемен преглед на државните записи за НЛО, со цел јавноста да добие што е можно поголем увид во достапните информации.
Директорот на Федералното истражно биро, Кеш Пател, објавувањето го нарече „историски чекор“, додека администраторот на НАСА, Џаред Ајзакман, изјави дека агенцијата ќе продолжи да ги проучува необјаснетите феномени преку научни истражувања и анализа на податоци.
Темата за НЛО со децении предизвикува интерес во САД, особено поради тоа што дел од случаите биле поврзувани со воени извештаи, сведоштва на пилоти и претходно недостапни државни архиви. Во последните години, притисокот за поголема транспарентност се засили и од јавноста и од дел од американските конгресмени, кои бараат институциите појасно да објаснат што е утврдено, што останува неразјаснето и кои документи може да бидат објавени без ризик за националната безбедност.
И покрај зголемениот интерес, американските институции досега не потврдиле постоење на вонземска технологија. Дел од пријавите, според претходни проценки на Пентагон, може да се поврзани со атмосферски услови, технички грешки, сензори или познати летала, но дел од случаите остануваат недоволно разјаснети поради ограничени податоци.
Од администрацијата велат дека сите документи биле прегледани од аспект на националната безбедност пред објавувањето. Дел од материјалите, сепак, сè уште не се целосно анализирани, што значи дека нивното значење допрва ќе се толкува од институциите, истражувачите и јавноста.
Американските власти најавуваат дека нови декласифицирани досиеја за НЛО ќе бидат објавувани сукцесивно, како дел од поширокиот процес за отворање на архивите поврзани со неидентификувани аномални појави.
