Повеќе судски згради во Србија денеска беа евакуирани по анонимни дојави за поставени бомби. Заканите предизвикаа привремен прекин на работата на судови во Нови Сад, Белград и Ниш.

Според првичните информации што ги пренесе Еуроњуз Србија, дојавите пристигнале телефонски. Првиот повик бил регистриран нешто по 11 часот во суд во Нови Сад, а потоа слични закани добиле и судови во другите два града.

Дојави за бомби и евакуација на вработените

По пријавите биле активирани безбедносните протоколи, а вработените ги напуштиле просториите. Во Нови Сад тие чекале пред судската зграда додека се организирал нејзиниот преглед.

Полициски и контрадиверзиски екипи ги проверуваат објектите, додека надлежните утврдуваат кој стои зад повиците.

Засега нема потврда дека во некоја од евакуираните згради е пронајдена експлозивна направа.