Има силен вкус, лесно се подготвува и се поврзува со бројни здравствени придобивки. Но тврдењето дека сигурно го „зајакнува имунитетот“ оди подалеку од она што го потврдуваат научните докази.

Куркумата содржи куркумин, соединение што ѝ ја дава препознатливата жолта боја и се истражува поради потенцијалните противвоспалителни и антиоксидативни ефекти. Сепак, според американскиот Национален центар за комплементарно и интегративно здравје, доказите засега не се доволни за сигурни заклучоци за нејзините здравствени придобивки. Тоа значи дека напитокот со куркума не може да се претстави како докажана заштита од настинка или грип, но сепак им бројни бенефити за нашиот организам.

Ѓумбирот има долга употреба во исхраната и традиционалната медицина. Подобро поткрепени се доказите дека може да помогне кај одредени видови мачнина, особено во бременоста. Но голем дел од истражувањата се направени со додатоци во исхраната, а не со домашни напитоци, па резултатите не можат автоматски да се пренесат на утринска чаша со ѓумбир.

Во ваквите мешавини често се додаваат лимон, јаболков оцет и црн пипер. Пиперинот од црниот пипер може да ја подобри апсорпцијата на куркуминот, но подобрата апсорпција сама по себе не докажува подобра заштита од инфекции.

И јачината на напитокот не е мерка за неговата корист. Ѓумбирот може да предизвика киселини и иритација на устата и грлото, а куркумата кај некои луѓе предизвикува желудочни тегоби.

За нормалното функционирање на имунолошкиот систем е важен доволен внес на витамини и минерали преку разновидна исхрана. Нивниот недостиг може да ја ослаби одбраната на организмот, но дополнителните количини не значат автоматски и поголема отпорност. Утринскиот напиток може да биде дел од таа исхрана ако ви годи, без очекување дека една чаша ќе ве заштити од сезонските вируси.