Украински беспилотни летала утрово ја оштетија инфраструктурата на руското пристаниште Уст-Луга на Балтичкото Море, соопшти регионалниот гувернер Александар Дрозденко. Станува збор за еден од најважните руски нафтени терминали преку кој се извезува сурова нафта и нафтени деривати кон светските пазари.

Руските единици за противвоздушна одбрана соопштија дека во текот на ноќта собориле повеќе десетици летала над регионот. Според податоците што ги објави Дрозденко, во реонот на самото пристаниште биле пресретнати 17 летала, додека вкупниот број на соборени дронови во целата област до шест часот изутрина достигнал 38. Гувернерот потврди дека и покрај дејствувањето на одбраната, во рамки на пристанишниот комплекс е забележана материјална штета.

На каналите на платформата Телеграм се појавија видеоснимки на кои се гледа пожар во кругот на пристаништето. Локалните власти засега не соопштуваат детали за точните размери на штетата ниту дали има прекин во претоварот на гориво.

Пристаништето Уст-Луга е мета на воздушни напади неколку пати од почетокот на годинава, како дел од украинската стратегија за таргетирање на руската нафтена логистика. Претходниот напад врз истиот комплекс беше регистриран на 14 август, кога според извештаите беа оштетени два преработувачки погони.