Европските власти предупредуваат дека дел од рибарските бродови можеби се користат за собирање разузнавачки податоци и следење на подводната инфраструктура.
Европската Унија во 2025 година санкционираше две руски рибарски компании поради сомнежи дека нивни бродови се користат во активности поврзани со шпионажа и саботажа на критична инфраструктура.
Компаниите „Норебо“ и „Мурман Си Фуд“ се најдоа на црната листа на Брисел, а неколку месеци подоцна санкции воведе и Норвешка. Обвиненијата се однесуваат на наводно собирање разузнавачки податоци и следење на подводни кабли и друга инфраструктура.
Европскиот комесар за рибарство и океани Костас Кадис предупреди дека Русија користи рибарски бродови за активности што ги надминуваат вообичаените риболовни операции. Според него, станува збор и за мапирање на критична инфраструктура и потенцијални саботажни активности.
Експертите посочуваат дека сомнителните бродови често се забележуваат во области каде што нема реална риболовна активност. Невообичаеното кружно движење, долгото задржување на едно место и маршрутите што отстапуваат од вообичаените се меѓу знаците што предизвикуваат сомнеж.
Според експерти за хибридни закани, користењето рибарски бродови како покритие за разузнавачки операции не е нова практика, но активностите во европските води се засилиле по почетокот на руската инвазија врз Украина во 2022 година.
Особено загрижувачка е подводната инфраструктура во Северното и Балтичкото Море. Подморските кабли преку кои се одвива најголемиот дел од интернет-сообраќајот, како и енергетските цевководи, се сметаат за чувствителни цели.
Европските власти се соочуваат со дополнителен проблем поради нетранспарентната сопственичка структура на дел од бродовите, честото менување имиња и знамиња и различните осигурителни аранжмани. Експертите бараат ЕУ и националните власти да продолжат со санкции и построги контроли.
