Најмалку 24 ученици го загубија животот во стампедо додека се обидуваа да побегнат од пожар што зафати две училишта во градот Букаву, во источниот дел на Демократска Република Конго. Огнената стихија зафати густо населена населба и уништи околу 300 домови пред локалните служби да успеат да ја стават под контрола, додека повредените се пренесуваат во околните болници.
Огнот избувнал во густо населен дел од Букаву, брзо проширувајќи се кон двете училишни згради во моментот кога наставата била во тек. Според локалните власти, паниката што настанала при обидот децата да се евакуираат предизвикала смртоносно стампедо во кое настрадале најмалку 24 ученици.
Пожарот пеплосал околу 300 куќи пред да биде изгаснат во попладневните часови. Очевидци на терен наведуваат дека густ чад со часови се издигал од урнатините и лимените покриви, а меѓу повредените има и возрасни лица. Точната причина за избувнувањето на пожарот засега не е позната.
Министерството за национално образование на ДР Конго преку соопштение изрази сочувство до семејствата на настраданите, наведувајќи дека конечната бројка на жртви сè уште не е дефинитивна поради големиот број повредени лица. Централната власт најави итна проценка на оштетените објекти за да се овозможи продолжување на наставата за преживеаните ученици.
Трагедијата во Букаву доаѓа само неколку дена по сличен смртоносен инцидент во главниот град Киншаса, каде што луѓе настрадаа во стампедо предизвикано од пожар во сала за венчавки. По тој настан, владата нареди засилени безбедносни инспекции низ целата земја за да се утврди дали јавните простори ги исполнуваат стандардите за заштита од пожари.
Безбедносната и институционалната состојба во Букаву, главен град на провинцијата Јужен Киву, е дополнително усложнена поради фактот што градот од февруари минатата година се наоѓа под контрола на бунтовничката група М23. Бунтовниците таму воспоставија своја паралелна управа.
Ова создава сериозен јаз во управувањето со кризни состојби, со оглед на тоа што официјалната влада од Киншаса нема ефективна власт на теренот, иако испраќа насоки за безбедносните стандарди.
