Течниот нафтен гас, односно плинот, од денеска бележи пониска цена на дел од бензинските станици во земјава, откако една од најголемите компании на пазарот ја намали малопродажната цена.
Според информациите од Владата, компанијата „Макпетрол“ од полноќ ја намалила цената на плинот од 59 на 54 денари за литар. Владината портпаролка Марија Митева изјави дека станува збор за прв конкретен ефект од мерките насочени кон намалување на трошоците за граѓаните.
Покрај намалувањето во малопродажбата, регистриран е пад и во трговијата на големо, каде цената е намалена за околу 10 денари по килограм, што во пресметка изнесува приближно пет денари по литар.
Според владините информации и пазарни податоци, и останатите компании веќе го следат овој тренд, па цените на бензинските станици во моментов се движат меѓу 53 и 54 денари за литар.
Ова намалување доаѓа во период кога цените на енергенсите на меѓународните пазари покажуваат стабилизација, што според економските анализи влијае и врз домашниот пазар на горива.
