Московската клиника „АлтраВита“ внесе необична измена во своите промотивни материјали: продолжи да нуди услуги за ин витро оплодување со донирана сперма од основачот на Телеграм, Павел Дуров, но до неговото име додаде официјална белешка дека руските власти го прогласија за терорист. По реакциите во јавноста, медицинскиот центар ангажираше правници за да процене дали договорот со бизнисменот мора целосно да се прекине.

Новинарските анализи во Русија открија дека клиниката „АлтраВита“ сè уште активно ја рекламира програмата за оплодување со материјал од милијардерот Дуров. Меѓутоа, неколку часа по медиумските написи, раководството го ажурираше сајтот. Покрај профилот на донаторот Дуров, сега стои соопштение дека тој е ставен на официјалниот регистар на Росфинмониторинг.

Реакцијата на клиниката следува по потегот на Федералната служба за безбедност (ФСБ), која на 29 јули отвори кривична постапка против Дуров за помагање терористички активности. На 30 јули Росфинмониторинг го внесе неговото име на црната листа, обвинувајќи го за тероризам.

И покрај тоа што процедурата и понатаму им е достапна на пациентите на клиниката за ин-витро оплодување, идното користење на донираниот материјал е под знак прашалник. Директорот на „АлтраВита“, Сергеј Јаковенко, изјави дека правниот тим ги испитува сите законски последици од понатамошната соработка. Клиниката не ја исклучува можноста за конечно раскинување на договорот со основачот на Телеграм.