Австралиската влада соопшти дека е загрижена поради наезда на глувци во западниот дел на земјата и дека ќе продолжи да соработува со индустријата за да се намали влијанието врз снабдувањето со храна.
„Очигледно сме загрижени за ситуацијата со глувците, вклучително и во Западна Австралија“, изјави министерот за енергетика Крис Боуен во телевизиско обраќање од Сиднеј.
Според локалните медиуми, глувците (долгогодишен проблем во австралиските региони за производство на жито) ги зафатиле фармите во житниот појас на Западна Австралија. Ова ги поттикна производителите во април да предупредат на можни загуби на посевите и да побараат пристап до посилни средства за уништување на глодарите.
Боуен додаде дека владата продолжува интензивно да работи со индустријата за да го намали влијанието на наездата врз домашното и меѓународното снабдување со храна.
„Наездата на глувци е многу тешка ситуација за фармерите, индустријата и владата“, рече тој.
Австралија, четвртиот најголем извозник на пченица во светот, ја доживеа најлошата наезда на глувци во 1993 година, кога глодарите уништија илјадници хектари посеви и нападнаа добиток на фарми за свињи и кокошки.
