Најголемата нуклеарна централа во Западна Европа, Гравелин на северот од Франција, мораше привремено да ја запре работата на три реактори откако група медузи ги затнаа собирните пумпи за морска вода со која се лади постројката. Францускиот енергетски гигант ЕДФ соопшти дека инцидентот не ја загрозува безбедноста на објектот или животната средина, но вкупното производство на нуклеарна струја во земјата веднаш забележа пад од 15,6 проценти.

Според официјалното соопштение од енергетската компанија ЕДФ, три реактори беа целосно исклучени во понеделникот, додека моќноста на четвртиот реактор е намалена на половина. Од вкупно шест реактори со капацитет од по 900 мегавати во централата близу Дункерк, само еден во моментов работи со полн капацитет. Шестиот реактор уште претходно беше надвор од мрежата поради планирано редовно одржување.

ЕДФ нагласи дека вонредното исклучување не претставува ризик за персоналот ниту за околината, но настанот доаѓа во момент кога францускиот енергетски систем веќе трпи притисок. Во текот на јуни и јули, високите температури и топлинските бранови неколку пати изнудија затворање реактори поради прегревање на реките кои се користат за ладење.

Ова не е првпат морските животни да предизвикаат технички дефект во нуклеарната централа Гравелин. Сличен инцидент со блокада на пумпите од медузи се случи и пред една година.

Слични прекини во работата на енергетските постројки од медузи се забележани и во други делови од светот, како во Шведска во 2013 година кога централа беше затворена три дена, или во Јапонија во 1999 година. Еколошките експерти предупредуваат дека прекумерниот лов на риби, загадувањето со пластика и порастот на температурата на морињата предизвикан од климатските промени создаваат идеални услови за неконтролирано размножување на медузите.