Топлотниот бран не го загрева само воздухот, туку и Јадранското Море, каде што температурата на водата на одредени места достигнува речиси 30 степени Целзиусови. Научниците предупредуваат дека ваквото затоплување веќе предизвикува сериозни промени во морскиот екосистем и овозможува ширење на инвазивни видови.
Според хрватските научници, северниот дел на Јадранот се загрева со рекордно темпо. Во последните десет години просечната годишна температура таму се зголемила за повеќе од 2,7 степени, што е највисока стапка на затоплување во Медитеранот и меѓу европските мориња.
„Во последните десет години имаме исклучително забрзано затоплување на северниот Јадран. Тоа е рекорд за целиот Медитеран и за европските мориња“, предупреди д-р Мартин Пфанкухен од Институтот „Руѓер Бошковиќ“ во Ровињ.
Инвазивните видови стануваат сè поголем проблем
Поради потоплото море, во Јадранот сè почесто се појавуваат инвазивни видови, како рибата лав (ватренка) и морскиот орев. Експертите предупредуваат дека тие претставуваат закана за домашните риби, школките и другите морски организми бидејќи се агресивни предатори и силни конкуренти за храна.
Дополнителен притисок врз морскиот екосистем создаваат загадувањето, отпадните и дождовните води и хемикалиите што преку реките завршуваат во морето.
Морето денес не е исто како пред 40 години
Истражувањата покажуваат дека Јадранското Море од 1985 година досега се загреало за околу 1,2 степени, а по 2011 година процесот значително се забрзал. Според научниците, температурата сега расте со темпо од еден степен на секои 16 години, што е значително побрзо од претходните климатски проекции. Во изминатите три децении во Јадранот се регистрирани повеќе од 20 нови видови планктон, а веќе се забележуваат и промени во составот на морските растителни и животински заедници.
Експертите предупредуваат дека доколку продолжи сегашниот тренд на затоплување, Јадранското Море во иднина ќе изгледа значително поинаку отколку пред само неколку децении, со сè повеќе нови видови и исчезнување на дел од автохтоните организми.
