Франција му забрани влез на израелскиот министер за финансии Безалел Смотрич, со образложение дека тој активно поддржува анексија на Западниот Брег и политики кои се спротивни на решението за две држави.

Францускиот министер за надворешни работи Жан-Ноел Баро изјави дека Смотрич промовира проширување на израелските населби и мерки кои би можеле да ја ослабат Палестинската управа. Според Париз, ваквите ставови се неприфатливи за поголемиот дел од меѓународната заедница.

Во соопштението на француското Министерство за надворешни работи се наведува дека насилството од страна на екстремистички доселеници врз Палестинците продолжува, како и нелегалните активности поврзани со ширење на населбите. Франција предупреди дека е подготвена да преземе дополнителни мерки доколку израелските власти не реагираат за подобрување на состојбата на терен.

Покрај Франција, забрана за влез на Смотрич воведоа и Велика Британија, Канада, Австралија, Нов Зеланд и Норвешка, како дел од санкции насочени кон лица кои, според овие земји, придонесуваат за зголемување на насилството и населувањето на Западниот Брег.

Минатиот месец Франција воведе забрана за влез и за израелскиот министер за национална безбедност Итамар Бен-Гвир. Одлуката беше донесена поради неговото однесување кон активистите од меѓународната хуманитарна флота „Сумуд“ за Појасот Газа, меѓу кои имало и француски државјани.