Езерото Натрон се наоѓа во северниот дел на Танзанија, во регионот Аруша, во рамките на Источноафриканскиот расед. Плиткото солено езеро е долго околу 57 километри и широко до 22 километри, а температурата на водата во одредени периоди може да достигне околу 41 степен Целзиусов.

Она што најмногу го издвојува Натрон е неговата исклучително алкална вода. Нејзината pH вредност може да достигне околу 10,5, што е далеку над неутралната вредност 7 и ја прави водата несоодветна за капење и пиење.

Високата алкалност е поврзана со испарувањето на водата и таложењето на соли и други минерали. Во одредени услови, минералите може да се наталожат на остатоците од животните и да создадат впечаток дека тие се „скаменети“.

Токму овие необични појави придонеле езерото да добие репутација на едно од најопасните езера во светот. Сепак, претставата дека во него речиси ништо не може да преживее не е целосно точна.

Во езерото сепак има живот

И покрај екстремните услови, во Натрон опстануваат одредени организми приспособени на високата алкалност и соленоста. Меѓу нив има алги и одредени видови риби.

Особено значајно е езерото за малите фламинга. Натрон е едно од најважните места за нивно размножување, бидејќи плитките и алкални води создаваат услови во кои предаторите потешко стигнуваат до нивните гнезда.

Фламингата се хранат со алги, меѓу кои и спирулина, која во езерото може да се развива во големи количества и претставува важен извор на храна.

Така, истите услови што го прават езерото непогодно за голем број животни истовремено создаваат специфично живеалиште за видови што се приспособиле на екстремната средина.

Зошто животните понекогаш изгледаат како да се претворени во камен?

Една од најморбидните карактеристики поврзани со Натрон се фотографиите од птици и други животни со минерални наслаги на телото.

Кога животните ќе угинат во или во близина на езерото, испарувањето и минералите можат да придонесат нивните остатоци да се прекријат со наслаги. Тоа создава впечаток дека животните се претворени во камен.

Дополнителна опасност за птиците може да претставува и површината на водата. Под одредени услови, езерото создава силна рефлексија, поради која птиците може да имаат погрешна претстава за површината и да слетаат во водата.

Токму затоа Натрон е необична комбинација од екстремна природна средина и важно засолниште за еден од најпрепознатливите видови птици во Африка.