Иако до следните претседателски избори во САД има уште време, вниманието на американските медиуми сè повеќе е насочено кон гувернерот на сојузната држава Кентаки, Енди Бешир. Аналитичарите сметаат дека токму тој би можел да стане едно од најголемите изненадувања на американската политичка сцена, благодарение на неговата способност да освојува доверба и кај умерените гласачи и кај независните избирачи. 

Бешир е демократ кој двапати победи на изборите во Кентаки – држава што со години важи за силно републиканско упориште. Токму тој успех го издвојува од останатите потенцијални претенденти за Белата куќа и му носи сè поголемо внимание во националната политика. 

Во своите јавни настапи, Бешир постојано истакнува дека Демократската партија треба повеќе да се фокусира на секојдневните проблеми на граѓаните – економијата, здравството, образованието и инфраструктурата – наместо исклучиво на политичките конфликти. Според него, политичарите треба да зборуваат „како нормални луѓе“ и да понудат практични решенија за проблемите на Американците. 

Во последните месеци Бешир ги засили јавните настапи низ САД, објави книга, започна подкаст и учествува на бројни политички собири, што дополнително ги поттикна шпекулациите дека сериозно размислува за претседателска кандидатура. Иако сè уште нема официјална најава, самиот изјави дека му е прифатливо да биде споменуван како можен кандидат за изборите во 2028 година. 

Американските политички аналитичари оценуваат дека токму неговата умереност, успешното водење на Кентаки и способноста да привлекува гласачи надвор од партиските рамки би можеле да го направат сериозен конкурент доколку реши да влезе во претседателската трка.