Најмалку 34 рудари го загубија животот во пакистанската покраина Белучистан по силната експлозија на метан што се случи во јагленокоп на длабочина од 1.200 метри под земја. Инцидентот предизвика целосно уривање на делови од рудничкиот канал во регионот Харнаи. Спасувачките тимови успеаја да извлечат неколку тела, но акциите се одвиваат бавно поради опасност од нови експлозии и високото ниво на токсични гасови.

Силната експлозија се случила во текот на ноќта кога во подземните канали имало десетици работници. Натрупувањето запалив гас метан предизвикало детонација која го срушила покривот на рудникот и го блокирала единствениот излез за тие што останале заглавени под земја.

Како што потврдија локалните власти во Белучистан, акцијата за спасување почнала веднаш, но условите на теренот се исклучително тешки. Концентрацијата на опасни гасови го оневозможува брзиот пристап на спасувачите до подлабоките делови од каналот.

Рудниците во регионот Белучистан се познати по лошите безбедносни услови и слабата техничка опременост. Повеќето од овие ископи функционираат без соодветни системи за вентилација и контрола на подземните гасови, што често доведува до слични несреќи.

Синдикатите на рударите со години предупредуваат дека сопствениците на рудниците ги занемаруваат основните правила за заштита при работа. Рударите често влегуваат во опасни вертикални канали без соодветна заштитна опрема, додека надлежните државни инспекции ретко спроведуваат проверки на терен.