Во Велес, по повод Денот на Европа, беше спроведена голема еколошка акција „Наша Европа, растеме заедно“, во рамки на која беа засадени над 3.000 садници во опожареното подрачје кај езерото „Младост“. Акцијата беше организирана со учество на ученици, студенти, волонтери, претставници на Европската Унија, дипломатски претставништва, локалната самоуправа и граѓански организации.

Настанот имаше за цел обнова на уништениот шумски појас и зајакнување на свеста за значењето на пошумувањето и заштитата на животната средина. Учесниците заеднички придонесоа кон обновување на екосистемот, испраќајќи порака за солидарност, заедништво и долгорочна грижа за природата.

Акцијата беше спроведена со стручна поддршка од ЈП Национални шуми – подружница Велес, при што учесниците добија насоки за правилно садење и значењето на пошумувањето за локалниот екосистем. Посебен акцент беше ставен на ангажманот на младите, кои активно се вклучија во процесот на обнова на терен.

Настанот го отворија претставници на Делегацијата на Европската Унија и европски амбасади, заедно со градоначалникот на Велес, а е дел од пошироката европска програма за одбележување на Денот на Европа низ повеќе градови во земјата. Преку оваа иницијатива се испрати порака дека заштитата на животната средина бара заедничко дејствување и континуирана посветеност.