Еден месец по парламентарните избори во Данска, преговорите за нова влада остануваат во ќор-сокак, а тоа го усложнува носењето политички одлуки во чувствителен момент, кога Копенхаген паралелно се соочува и со заострените односи со администрацијата на Доналд Трамп околу Гренланд.
Техничката премиерка Мете Фредериксен, која по изборите доби кралски мандат да се обиде да состави нов кабинет, досега успеа да обезбеди поддршка само од левичарските партии. Тоа не е доволно за парламентарно мнозинство во данскиот парламент, кој има 179 пратенички места.
Центристичката коалиција на Фредериксен го загуби мнозинството на изборите од 24 март, иако нејзините Социјалдемократи останаа најсилечна партија со 38 пратеници. Според Ројтерс, резултатот се толкува како последица на незадоволството на гласачите поради високите трошоци за живот и желбата за политичка промена по седум години нејзино владеење.
Фредериксен изјави дека нема рок до кога мора да завршат разговорите и дека тие ќе траат онолку колку што е потребно. Но во меѓувреме, нејзината влада останува само во технички мандат, со ограничени овластувања. Тоа е особено чувствително затоа што Данска во моментов мора да се справува и со дипломатскиот спор со САД околу Гренланд.
Дополнителен проблем е што досегашните коалициски партнери, партијата Умерени и десничарската Либерална партија, не сакаат нова влада што би зависела од крајната левица. Поради тоа, договорот и натаму изгледа далеку. И лидерот на Умерените, Ларс Локе Расмусен, и лидерка на Конзервативците, Мона Јул, јавно сигнализираа дека разговорите не напредуваат и дека Фредериксен можеби повеќе не треба да ги води.
Според политичките проценки што ги пренесува Ројтерс, ако сака да остане на чело на владата, Фредериксен најверојатно ќе мора да се откаже од дел од својата програма, особено од најавениот данок на богатство за најимуќните. Во спротивно, можно е мандатот за составување влада да му биде доверен на друг лидер.
