Просечните цени за новите огласи за недвижности во Велика Британија паднаа за 2 проценти во последниот месец, што претставува најголем пад за август во изминатите осум години. Ова го покажаа најновите податоци од специјализираниот портал Рајтмув. Намалувањето на побарувачката е последица на високите каматни стапки на стамбените кредити и општата економска несигурност, а најсилен удар е забележан во главниот град Лондон и неговите најбогати населби.

Лондон забележа најголем месечен пад на цените на недвижностите во земјата од 4,4 проценти. Ова значи дека новите барани цени за станови и куќи во британската престолнина се во просек пониски за речиси 30.000 фунти во споредба со претходниот месец.

Уште подрастичен е падот во најексклузивните и најбогатите делови од градот, каде сопствениците се принудени значително да ги намалат своите очекувања. Најновите бројки укажуваат дека во одделни луксузни населби просечната барака цена за недвижност падна за речиси 100.000 фунти за само 30 дена поради зголемената конкуренција меѓу продавачите и намалениот интерес од купувачите.

Повеќе релевантни финансиски имотни институции во земјата го потврдуваат трендот на забавување. Кралскиот институт на овластени проценувачи соопшти дека британскиот пазар во изминатиот месец бил изразено воздржан, додека податоците на банката Лојдс покажуваат дека цените главно стагнираат.

Аналитичарите истакнуваат дека потенцијалните купувачи се сè попретпазливи поради неколку клучни фактори: високите хипотекарни камати кои го поскапуваат задолжувањето, намалената достапност на куќите за просечното домаќинство и глобалната економска несигурност. Според податоците од банката Нејшнвајд, цените на национално ниво во изминатиот месец забележале минимален раст од едвај 0,1 процент, што дополнително ги потврдува оценките за замрзнување на пазарот.