Унгарија и Украина постигнаа договор за заштита и проширување на правата на унгарското малцинство во Закарпатската Област, потег што би можел да отстрани една од главните пречки на патот на Киев кон членство во Европската Унија. Унгарскиот премиер Петер Маѓар соопшти дека договорот предвидува значително унапредување на јазичните, образовните, културните и политичките права на околу 100.000 етнички Унгарци кои живеат во западна Украина. Според него, станува збор за важен исчекор кој може да овозможи деблокирање на првиот кластер од пристапните преговори на Украина со ЕУ.
Секој чекор во процесот на евроинтеграција на Украина бара едногласна поддршка од сите земји членки на Унијата, а прашањето за правата на унгарското малцинство со години беше една од точките на несогласување меѓу Будимпешта и Киев.
Според договореното, Украина ќе спроведе реформи во образовниот систем за припадниците на етничките малцинства. Децата ќе имаат можност да го користат мајчиниот јазик во наставата, додека учениците од унгарска националност ќе можат да полагаат испити на унгарски јазик и слободно да ги користат унгарските национални симболи и знамиња за време на свечености и културни настани.
„Сто илјади Унгарци ќе ги добијат назад своите фундаментални права“, изјави Маѓар, нагласувајќи дека украинските власти се согласиле договорените мерки да бидат вклучени во националното законодавство, како и во акцискиот план поврзан со преговорите за членство во Европската Унија.
Договорот се смета за потенцијален дипломатски пробив во односите меѓу двете соседни земји, особено во период кога Украина настојува да го забрза својот европски пат и да обезбеди поширока поддршка од земјите членки на Унијата. Дополнителен сигнал за затоплување на односите е и најавата на Маѓар дека е подготвен да оствари средба со украинскиот претседател Володимир Зеленски, што би можело да отвори нова фаза во билатералната соработка меѓу Будимпешта и Киев.
