Гласините за сексуален напад и злоупотреба на моќта на социјалните мрежи не секогаш се сфаќаат сериозно, но обвинувањата против фронтменот на германскиот бенд Рамштајн, Тил Линдеман сега добиваат на тежина. По тврдењата на Шелби Лин, кои беа објавени во јавноста минатата недела, новата истрага на германските новинари покажува дека случајот би можел да биде дел од систематскиот процес за задоволување на сексуалните барања на Линдеман.
Случајот што предизвика повеќе исповеди: сведочењето на Шелби Лин
Лин, фан од Ирска, отпатувала во Вилнус, Литванија, за да присуствува на концертот на Рамштајн, првиот од нивната европска турнеја. Таму, таа била поканета на концертна забава. Таа известува дека таму го запознала фронтменот на бендот Тил Линдеман и дека тој сакал да има секс со неа. Лин рече дека Линдеман реагирал многу агресивно кога таа го одбила. Таа се сомнева и дека во еден од нејзните пијалоци била ставена дрога, бидејќи не се сеќава на дел од вечерта откако испила само две пијачки и една текила. Таа вели дека по концертот повраќала 24 часа и имала модринки. Таа објави слика од повредите на интернет и поднесе жалба.
Млади обожавателки систематски регрутирани за секс?
На 2 јуни, германскиот јавен радиодифузен сервис НДР и дневниот весник Зидојче цајтунг објавија ексклузивен извештај со нови сведоштва на жени чии искуства го отсликуваат она на Шелби Лин, откривајќи систематски процес за регрутирање атрактивни млади жени како учеснички на забавите после шоуто, кои наводно биле специјално избрани да имаат секс со Тил Линдеман.
Новинарите ги собраа изјавите на повеќе од десетина жени, кои опишаа како им пристапил тимот на Рамштајн, преку Инстаграм или на концерти. Некои од нив биле замолени да испратат фотографии пред настанот или биле фотографирани и снимени на лице место. Избраните жени велат дека биле замолени да се облекуваат на одреден начин за концертот и добиле пристап до она што е познато како „ред нула“ за време на концертот, посебен ограничен простор директно пред сцената.
Една жена изјавила дека дури и била директно информирана дека пристапот до забавата е само за оние кои се заинтересирани за секс со Линдеман и дека 60-годишниот рокер сакал да присуствуваат само многу млади жени.
Други жени откриваат дека не биле ни прашани за нивната возраст, иако на забавите им нуделе алкохол и нелегални дроги. Новинарите, исто така, собраа неколку скриншотови од разговорите на WhatsApp и Instagram кои ги поддржуваат изјавите на жените.
Тие, исто така, снимија сведоштва на две жени, кои одлучија да останат анонимни, но обезбедија законска изјава, во која ја опишуваат нивната сексуална средба со Тил Линдеман.
Една од нив опишува дека имала исклучително болен секс со ѕвездата. Иако не се осмелила да му каже дека се чувствува непријатно во ситуацијата „затоа што тоа е Линдеман“, таа вели дека сега сфаќа дека тоа е форма на злоупотреба на моќта.
Другата жена известува како завршила во несвест на хотелски кревет додека присуствувала на забавата на Линдеман после шоуто. Таа вели дека кога се освестила тој се уште лежел врз неа. Ја прашал дали треба да престане, но таа рекла дека „не знае што сака да престане да прави“. Линдеман потоа заминал. Таа подоцна побарала од членовите на тимот да разговараат со Линдеман, но тие не ја сфатиле поентата. Единствено што сакала е да открие дали барем користел кондом.
Нема коментари од Линдеман и Рамштајн
Линдеман и луѓето вклучени во пријавеното регрутирање на младите жени не одговориле на барањата на НДР и Зидојче цајтунг за коментари.
По изјавата на Лин, бендот ги отфрли сите обвинувања на нивниот Твитер профил.
„Во врска со наводите кои кружат на интернет за Вилнус, можеме да ја исклучиме можноста тоа што се тврди да се случило во нашата средина“, напишаа тие во твитот. „Не ни е познато за каква било официјална истрага за оваа работа“.
Други жени пријавиле – анонимно – дека имале слични искуства и ја изразиле својата целосна солидарност со Шелби Лин. Некои повикаа на претпазливост, бидејќи тврдењата сè уште не се докажани.
Многу фанови на Рамштајн сметаат дека објавата на бендот на Твитер е недоволна и побараа преку каналите на социјалните мрежи на бендот да се осврнуваат на проблемот поексплицитно.
Еден корисник на Инстаграм праша: „Дали не сакате барем да се обидете да го решите овој проблем? Премногу е сериозно за еден твит да направи разлика“.
Рамштајн, сепак, до сега не се вклучуваат во коментирање на овие случаи, објавувајќи слики од нивните настапи на нивните канали на социјалните мрежи.
Поема од 2020 година на Линдеман за силување
Покрај актуелните обвинувања, на интернет нашироко се споделува и песна на Тил Линдеман од 2020 година, во која тој пишува: „Сакам да спијам со тебе додека спиеш… Малку Рофинол во чаша вино / Не можеш да мрдаш воопшто / А ти спиеш, тоа е благослов“.
Поемата веќе беше критикувана по нејзиното објавување, но беше протолкувана како фантазија раскажана од перспектива на измислен силувач. Линдеман и Рамштајн се познати по тоа што ги кршат сите табуа со нивните текстови, видеа и маркетиншки акробации.
Лин исто така собра повеќе сведоштва
Сведочењето на Шелби Лин почна да добива на сила откако на 25 мај таа создаде нов профил на Твитер со опис на профилот, „Девојката што беше дрогирана на Рамштајн“.
Го користи профилот за да го документира своето искуство и нејзините тврдења, како и да собира сведоштва од други наводни жртви. По првичните извештаи за сексуален напад, Лин додаде појаснување на Твитер, во кое прецизира дека Линдеман не ја допирал. “Тој прифати дека не сакам да имам секс со него. Никогаш не тврдев дека ме силувал”.
Извор: DW
