Романски борбени авиони Ф-16 соборија две беспилотни летала над романските територијални води во Црното Море, откако воените радари регистрираа воздушни цели источно од Змискиот Остров. Инцидентот се случува во зона на НАТО сојузот по неколкудневна ескалација и напади со дронови врз трговски танкери во близина на романскиот брег, што директно ја зголемува заканата за безбедноста на поморските рути и цивилната пловидба во регионот.

Два романски ловци Ф-16 полетаа попладнево во 17:43 часот од воздухопловната база Борчеа со наредба да пресретнат група воздушни цели. Воените набљудувачки радари претходно забележаа движење на летала на оддалеченост од околу 120 километри источно од Змискиот Остров, со курс насочен кон југозапад.

Првото беспилотно летало беше погодено и соборено во 18:01 часот. Четири минути подоцна, во 18:05 часот, пилотите го уништија и вториот дрон. Романското Министерство за одбрана потврди дека двете летала се елиминирани над романските територијални води, без да соопшти детали за нивното потекло или за типот на опремата што ја носеле.

Ова пресретнување доаѓа по неколку последователни инциденти во црноморскиот басен каде што цел беа цивилни пловни објекти. Најмалку седум морнари се водат како исчезнати по неодамнешниот напад со беспилотни летала врз два трговски танкери во близина на романскиот брег.

Романскиот претседател Никушор Дан ги потврди ударите врз бродовите, воздржувајќи се од директни обвинувања кон Москва. Извори од НАТО сојузот наведуваат дека употребените дронови при тие напади биле од руско производство. Зачестените воздушни упади во непосредна близина на границите на Алијансата го зголемуваат ризикот од директен воен судир на Црното Море.