Четири лица загинаа, а 29 се повредени при напад со украински дронови врз рускиот пристанишен град Новоросијск, соопштија регионалните власти. Меѓу настраданите има и едно дете. Новоросијск претставува еден од клучните руски центри на Црното Море за извоз на нафта и жито, каде падот на соборените летала предизвика пожари во индустрискиот и станбениот појас.

Ukrainian drones hit an oil terminal in Novorossiysk, Russia. pic.twitter.com/psTxp7TwMq

— Open Source Intel (@Osint613) September 9, 2026

Гувернерот на Краснодарскиот Крај, Венијамин Кондратјев, објави дека ударите предизвикале сериозни последици на теренот, при што десетици луѓе се хоспитализирани или добиле медицинска помош. Според изјавата на градоначалникот на градот, Андреј Кравченко, остатоци од пресретнатите беспилотни летала паднале во кругот на неколку локални претпријатија, но и во непосредна близина на станбена зграда. Локалните противпожарни екипи интервенираа на повеќе локации за локализирање на пламените јазици.

Новоросијск има стратешко значење за рускиот енергетски извоз. Пристаништето служи како главен терминал преку кој се транспортираат големи количини сурова нафта и житни култури од регионот кон меѓународните пазари.

Нападот не беше изолиран само на подрачјето на Новоросијск. Регионалните власти потврдија дејства и во блискиот крајбрежен град Анапа.

Во Анапа, остатоците од летала нанесоа директна материјална штета врз три приватни семејни куќи, а оштетувања претрпе и локална детска градинка. Според официјалните податоци што ги соопшти Кондратјев, на подрачјето на Анапа нема регистрирано загинати или повредени цивили.