Проектот за промоција на Будимпешта меѓу помладата публика чинел 3,18 милијарди форинти, односно околу осум милиони евра од буџетот, објави унгарскиот истражувачки портал 444.hu. Иницијативата потекнала директно од Рахел Орбан, ќерка на премиерот Виктор Орбан, а официјалните документи покажуваат дека вистинскиот трошок бил двојно поголем од првично соопштените владини суми.

Унгарската туристичка агенција претходно тврдеше дека тридневната промотивна кампања организирана во мај чинела околу 1,5 милијарди форинти.

Сепак, документите обезбедени преку барање за слободен пристап до информации покажуваат нето трошок од 3,1809 милијарди форинти. Речиси половина од оваа сума, односно 1,4789 милијарди форинти, отишла исклучиво за закуп на медиумски простор на каналите на поканетите инфлуенсери на социјалните мрежи. Првично прикажаната бројка всушност го покривала само овој сегмент.

Кампањата вклучувала десетици странски гости од социјалните мрежи, меѓу кои и познати јавни личности како Оливија Палермо и Томи Фјури. Нивниот престој опфаќал сместување во луксузни хотели, приватни забави и вечери во елитни ресторани низ главниот град на Унгарија.

Истражувачките новинари наведуваат дека значителен дел од јавните средства за организација и сместување завршил токму во угостителски и хотелски капацитети што се поврзуваат со семејни бизниси и кругови блиски до семејството Орбан.