Откако вчера беа пронајдени остатоци од подморницата „Титан“, која исчезна во водите на Атлантскиот океан на 18 јуни, главните претпоставки се дека таа имплодирала по оштетување на нејзиниот труп.

Идентификуваните остатоци кои беа пронајдени од далечински управувана подморница се состојат од конусот на опашката, кој не е дел од садот под притисок и делови од предниот и задниот дел на подморницата, кои се дел од комората која е под притисок. Според крајбрежната стража на САД, полето за отпадоци е концентрирано во две области.

Крајбрежната стража изјави дека се сомнева дека имплозијата на садот под притисок најверојатно се случила пред да започнат спасувачките операции, односно веднаш по губењето на комуникацијата. Американската морнарица по откривањето на остатоците декласифицираше отчитувања од сонар кои ја потврдуваат имплозијата.

Што е имплозија?

Имплозија е спротивна на експлозијата, и се случува кога некој предмет ќе се урне во себе во милисекунди. Катастрофална имплозија, како што се верува дека ја уништила подморницата Титан, би се случила со неверојатна сила и брзина со оглед на притисокот на водата на дното на океанот.

Остатоците од Титаник почиваат на морското дно во Северниот Атлантик на длабочина од околу 4.000 метри. На ниво на морето, атмосферскиот притисок е 14,7 пси или 100 килопаскали. Како што одите подлабоко под вода, тој притисок се зголемува и се зголемува. Притисокот на водата на местото на потонатиот брод Титаник е приближно 6.000 psi (повеќе од 41.000 килопаскали).

Под овој притисок, дури и најмалата структурна грешка може да резултира со фатални последици. Смртта би била практично моментална за патниците на комората под притисок.

Што ја предизвикало имплозијата?

Тоа се уште не е јасно. Како што го цитира Ал Џезера, Родерик Смит, професор по инженерство на Империал колеџ во Лондон, рече дека експлозијата најверојатно се должи на структурно попуштање на трупот на подморницата под притисок, но остатоците ќе треба да се извлечат за да се спроведе целосна истрага. Па дури и тогаш, можеби не е лесно точно да се одреди причината.

Како изгледа имплозијата на „Титан“?

На социјалните мрежи се појавија видеа и анимации кои прикажуваат како изгледала имплозијата на подморницата „Титан“. Според овие визуелизации станува јасно дека распаѓањето на подморницата била моментално и дека патниците веројатно не биле ни свесни што се случува и нивната смрт била моментална.