Судирот меѓу Иран и САД продолжува да се шири низ Блискиот Исток. Иран лансирал 20 балистички ракети кон Јордан, во напад насочен кон американски воени бази и објекти на јорданска територија. Јорданските вооружени сили соопштија дека нивната противвоздушна одбрана соборила 18 од ракетите. Другите две паднале во ненаселени подрачја, а според досегашните информации нема жртви.
Сепак, нападот предизвикал материјална штета на американската воздухопловна база Мувафак Салти. Според извори запознаени со случувањата, за кои известува Си-Би-Ес, осум авиони Ф-15 претрпеле полесни оштетувања и повторно биле ставени во употреба. Оштетен бил и еден авион А-10 „Тандерболт“. Според истите извори, авионот бил погоден во нападот и му било оштетено крилото.
Техеран: Нападот е одмазда кон САД
Иранското Министерство за надворешни работи соопшти дека нападите врз Јордан биле одмазднички одговор на американските напади врз ирански нафтени танкери. Од Техеран порачаа дека американската страна ќе ги сноси последиците за, како што наведоа, непријателските акции против Иран.
Во соопштението се наведува дека иранските вооружени сили ги нападнале американските воени бази и објекти во Јордан во рамките на правото на „легитимна одбрана“. Во меѓувреме, американски официјален претставник за АП изјавил дека САД нападнале повеќе ирански нафтени танкери, по нови обиди за ракетни напади врз американски воен брод.
Трамп најавува нови напади
Американскиот претседател Доналд Трамп изјави дека очекува војната со Иран да заврши „веднаш по“ конгресните избори во САД на 3 ноември. Трамп оцени дека Техеран се обидува да влијае врз изборите, но дека под економскиот притисок повеќе нема да може долго да издржи.
Истовремено најави дека САД ќе извршат дополнителни напади врз Иран. Тој рече дека Вашингтон во моментов не се обидува да постигне договор со Техеран, но не ја исклучи можноста за преговори.
Иран предупредува на нова ескалација
Висок неименуван ирански функционер изјавил дека Техеран е подготвен за интензивирање на конфликтот со САД. Според него, Иран ќе ги засили контранападите доколку Вашингтон продолжи со напади врз иранска територија и инфраструктура.
Функционерот тврди дека економскиот притисок врз Иран се зголемува, но дека иранското раководство конфликтот го доживува како егзистенцијална закана и затоа нема намера да попушти пред американската поморска блокада и нападите врз иранските танкери. На тој начин, најновите напади покажуваат дека конфликтот повеќе не е ограничен само на територијата на Иран и САД, туку ризикува дополнително да ги вовлече и земјите од регионот.
