Бензините поевтинуваат за 2,50 денари за литар, додека дизелот поскапува за два денара, одлучи Регулаторната комисија за енергетика (РКЕ). Новите цени на горивата стапуваат во сила по полноќ, односно на 20 октомври во 00:01 часот.
Максималната цена на Еуросупер БС-95 ќе изнесува 96 денари за литар, а на Еуросупер БС-98 ќе биде 98 денари. Еуродизел ќе се продава за најмногу 99 денари за литар.
Новите цени на горивата од 20 октомври
Со одлуката поскапува и екстра лесното масло за домаќинство, за два денара, на 110,50 денари за литар. Цената на мазутот се зголемува за 1,837 денари и ќе изнесува 53,579 денари за килограм.
Максималните малопродажни цени се:
- Еуросупер БС-95: 96 денари за литар;
- Еуросупер БС-98: 98 денари за литар;
- Еуродизел: 99 денари за литар;
- Екстра лесно масло ЕЛ-1: 110,50 денари за литар;
- Мазут М-1 НС: 53,579 денари за килограм.
Според РКЕ, референтните цени на бензините на светскиот пазар се намалиле за просечно 4,142 проценти во однос на претходната пресметка. Кај дизелот е забележано зголемување од 2,966 проценти.
Во пресметката се применети ДДВ од 10 проценти за дизелот и намалување на акцизата за четири денари по литар за двата бензина и за дизелот.
РКЕ нагласува дека утврдените износи се максимални. Трговците можат да ги продаваат горивата и по пониски цени.
