Американскиот претседател Доналд Трамп се соочува со можен политички пораз на претстојните избори за Конгресот кои се одржуваат на средина од неговиот мандат. Последните анкети покажуваат дека Демократската партија има високи шанси да го преземе Претставничкиот дом, но и да обезбеди мнозинство во Сенатот. Доколку републиканците ја загубат законодавната контрола, администрацијата во Вашингтон влегува во длабока институционална блокада.

Според просекот од истражувањата на јавното мислење што ги објавува платформата „Рил клир полинг“ (RealClearPolling), демократските кандидати за Конгресот имаат поддршка од 51,4 проценти од гласачите, наспроти републиканските со 43,2 проценти. Математичките проекции покажуваат дека демократите имаат 80 проценти шанси да освојат мнозинство во Претставничкиот дом, 60 проценти за преземање на Сенатот и вкупно 58 проценти шанси целосно да ги контролираат двата дома.

За преземање на Претставничкиот дом на демократите им се потребни четири дополнителни пратенички места во споредба со сегашниот состав. Во Сенатот, каде што републиканците моментно имаат тенко мнозинство од 53 спрема 47 места, силите можат целосно да се прекршат преку неколку клучни сојузни држави.

„Морате да победите на овие избори. Ако не победите, демократите ќе најдат причина да ме отповикаат“, ги предупреди Трамп републиканските конгресмени уште на почетокот на годината. Соочувањето со опозициско мнозинство на Капитол Хил значи дека претседателот ќе ги помине следните две години под постојан институционален притисок.

Демократското мнозинство добива директна моќ да ги сопре сите законодавни иницијативи на Белата куќа, да го блокира буџетот, да го отежне именувањето на судии и високи функционери, но и да отвори собраниски истраги за финансиското работење на неговото семејство.

Трамп веќе влегува во завршницата од кампањата со сè поагресивни собири, но нискиот рејтинг на доверба кај неопределените гласачи останува главниот товар за републиканците.