Претседателот на Украина, Володимир Зеленски, денеска пристигна во Париз, каде што ќе учествува на состанокот на таканаречената „Коалиција на желни“, соопшти портпаролот на украинскиот претседател.
Во Елисејската палата пристигнаа и специјалниот пратеник на американскиот претседател Доналд Трамп, Стив Виткоф, како и неговиот зет Џаред Кушнер, пренесува агенцијата Ројтерс.
Се очекува состанокот на „Коалицијата на желни“ да биде посветен на придонесите на земјите-членки во евентуалните мултинационални безбедносни сили за Украина, во случај на постигнување прекин на огнот. Според информациите, овие активности би се реализирале во тесна координација со Украина и со поддршка од Соединетите Американски Држави.
Како што наведува украинската агенција „Укринформ“, разговорите во Париз имаат за цел да ја утврдат рамката за меѓународна соработка и ангажман, во контекст на можен мировен процес и идната безбедносна архитектура во регионот.
