Украинскиот претседател Володимир Зеленски, во пресрет на средбата со Доналд Трамп на Флорида, изјави дека Украина прави сè што е во нејзина моќ, но дека конечната одлука за постигнување мир во голема мера зависи од поддршката и одлуките на меѓународните партнери.
Состојбата во нуклеарната електрана Запорожје е стабилна, соопшти РИА
Во меѓувреме, Состојбата во Запорошка нуклеарна електрана, која се наоѓа под руска контрола, во моментов е стабилна, а снабдувањето со електрична енергија е обезбедено преку еден високо-напонски далекувод, изјави портпарол на електраната, пренесе руската државна новинска агенција РИА.
Во непосредна близина на електраната се изведуваат поправки на енергетската инфраструктура, кои се одвиваат по стапувањето на сила на локален прекин на огнот постигнат со посредство на Меѓународна агенција за атомска енергија. Работите се под директен надзор на тим на Агенцијата и, според проценките, се очекува да траат уште неколку дена.
Запорошката нуклеарна електрана, сместена на левиот брег на реката Днепар, е најголемата нуклеарна централа во Европа и повеќе пати беше предмет на загриженост од меѓународната заедница поради воените дејствија во нејзина близина.
Паралелни напади врз енергетска инфраструктура
Додека од Запорожје пристигнуваат информации за стабилна состојба, борбите на други делови од Украина продолжуваат. Украинските власти соопштија дека руските сили во текот на вчерашниот ден двапати ја нападнале Полтавската област, при што во еден од нападите било оштетено енергетско постројување. Според регионалната администрација, оштетена е технолошка опрема, но нема повредени лица, а екипи на енергетичари работат на отстранување на последиците.
Истовремено, украинската војска потврди дека во текот на ноќта извела успешен напад со беспилотни летала врз нафтна рафинерија во рускиот град Сизрањ, во Самарската област. Според Генералштабот во Киев, нападот предизвикал голем пожар, а проценката на материјалната штета е во тек. Киев наведува дека ваквите напади се дел од стратегијата за намалување на приходите на Москва од извозот на нафта.
