Американскиот претседател Доналд Трамп првпат јавно се огласи за состојбата во Венецуела по неодамнешните настани, изјавувајќи дека не очекува одржување нови избори во таа земја во наредните 30 дена.
„Ќе биде потребно одредено време. Прво мора да ја средиме земјата. Не можете да имате избори“, изјави Трамп во интервју за американската телевизија NBC News. „Мора да ја излечиме земјата додека не се опорави“, додаде тој.
И покрај апсењето на Николас Мадуро од страна на американските сили, венецуеланската влада и понатаму го смета за легитимен претседател на државата.
Што предвидува уставот на Венецуела?
Според уставот на Венецуела, во случај на трајно отсуство на претседателот, потпретседателот ја презема функцијата и е должен да распише нови избори во рок од 30 дена. Сепак, засега останува нејасно дали актуелното државно раководство ја третира ситуацијата како трајно отсуство на шефот на државата.
Делси Родригез, која од 2018 година ја извршуваше функцијата потпретседателка, во понеделникот положи заклетва како вршител на должноста претседател. Врховниот суд на Венецуела ѝ ја довери привремената улога за време на викендот.
За време на викендот, американските сили извршија напади врз цели во Венецуела и го приведоа Мадуро заедно со неговата сопруга Силија Флорес. Тие потоа беа префрлени во Њујорк, каде треба да се соочат со обвиненија поврзани со наводни кривични дела, вклучително и трговија со дрога.
