Левичарската влада на Шпанија усвои план со кој околу 500.000 странски мигранти што престојуваат во земјата без соодветни документи ќе добијат дозвола за престој и работа. Потегот претставува остар контраст со заострените имиграциски политики што се применуваат во голем дел од Европа.
„Ќе можат да работат во кој било сектор и во кој било дел од земјата“, изјави министерката за миграции Елма Саиз, нагласувајќи дека целта е да се пополни недостигот од работна сила и да се ублажат последиците од стареењето на населението.
Според неа, владата ќе го регулира статусот на луѓе кои веќе живеат во Шпанија, со што ќе им се овозможат основни права и формално вклучување во општеството.
Кој ќе има право на легализација
Мерката се однесува на мигранти кои континуирано престојувале во Шпанија најмалку пет месеци до 31 декември 2025 година, како и на лица кои до тој датум поднеле барање за меѓународна заштита. Како доказ ќе можат да користат јавни или приватни документи, или комбинација од двата типа.
Апликантите ќе мора да имаат чисто казнено досие и да не претставуваат закана за јавниот ред. Дозволите ќе важат и за нивните деца кои веќе живеат во Шпанија.
Се очекува рокот за поднесување барања да започне во април и да трае до крајот на јуни. Планот ќе биде усвоен со уредба, без гласање во парламентот, каде што владината коалиција предводена од социјалистите нема стабилно мнозинство.
Остра критика од опозицијата
Конзервативната и крајно десничарската опозиција жестоко реагираше, тврдејќи дека ваквите мерки ќе поттикнат нов бран нелегална имиграција и ќе извршат притисок врз јавните служби.
Лидерот на Народната партија, Алберто Нуњез Феихо, напиша на социјалната мрежа X дека „апсурдниот план“ ќе ги преоптовари здравството, образованието и социјалните сервиси.
„Во социјалистичка Шпанија, нелегалноста се наградува“, порача Феихо, најавувајќи дека доколку дојде на власт, целосно ќе ја промени миграциската политика.
Поддршка од Црквата и граѓанскиот сектор
За разлика од опозицијата, Шпанската католичка црква и дел од граѓанските организации ја поздравија мерката, оценувајќи ја како „чин на социјална правда“ и неопходен чекор кон интеграција на луѓето кои веќе се дел од шпанското општество.
Премиерот Педро Санчез повеќепати истакна дека Шпанија има структурна потреба од имигранти за да се одржи економскиот раст, пазарот на труд и пензискиот систем.
Официјални податоци покажуваат дека во последниот квартал од 2025 година, 52.500 од вкупно 76.200 нововработени биле странски државјани. Според проценките на тинк-тенкот Funcas, на почетокот на 2025 година во Шпанија живееле околу 840.000 недокументирани мигранти, најголем дел од Латинска Америка.
Според Националниот завод за статистика, во Шпанија живеат повеќе од седум милиони странци, од вкупно 49,4 милиони жители. Земјата останува една од главните европски влезни точки за мигранти кои бегаат од сиромаштија, конфликти и прогон, особено преку Канарските Острови.
