Студентите кои го блокираат Универзитетот во Нови Сад ги повикаа граѓаните да се соберат пред станицата, каде што во 11:52 часот ќе биде оддадена почит на жртвите.
„Не ги забораваме жртвите од паѓањето на надстрешницата во Нови Сад. Овој настан, последица на небрежност, неодговорност и институционална незаинтересираност, однесе животи и остави семејства и цела заедница во болка, со прашања на кои сè уште нема одговори“, соопштија новосадските студенти.
По комеморацијата, присутните ќе се упатат по Булеварот на ослободувањето до Мостот на слободата, кој ќе биде блокиран неколку часа.
На протестот по повод Први мај повика и Академската мрежа „Слободен универзитет Нови Сад“.
„Време е за правда, време е за одговорност! Сметаме на вашата поддршка“, се вели во нивниот повик.
Граѓаните собрани околу иницијативата „Зборови на Нови Сад“, под паролата „НС пумпа“, исто така повикаа на масовно обележување на овој трагичен ден.
Планирано е пристигнување на граѓани од три различни локации во градот – од Футошки пат во 9:15 часот, од Лиман во 9:45 и од Ново Насеље во 10:15. Колоните ќе минуваат покрај месните заедници, каде ќе им се приклучуваат други граѓани, а сите ќе се сретнат на Булеварот на ослободувањето и ќе продолжат кон Железничката станица.
