САД распоредуваат дополнителни 2.200 маринци и три амфибиски воени бродови на Блискиот Исток, додека војната меѓу САД, Израел и Иран влегува во втората недела. Конфликтот веќе однесе повеќе од 2.000 животи во најмалку десет земји и предизвика силни потреси на глобалните пазари.
Американски маринци и воени бродови се упатуваат кон регионот
Американската војска испраќа амфибиска јуришна група предводена од воениот брод USS Tripoli (LHA-7). Во состав на групата се и бродовите USS San Diego (LPD-22) и USS New Orleans (LPD-18).
Силите доаѓаат од Јапонија, каде што се стационирани во базите во Сасебо и Окинава, и се дел од 31-та маринска експедициска единица. Со нив се распоредуваат и околу 20 борбени авиони F-35B Lightning II.
Американските власти нагласуваат дека распоредувањето не значи дека маринците веднаш ќе бидат испратени во копнена операција во Иран, туку дека се работи за дополнителни поморски, воздушни и амфибиски сили кои би можеле да бидат активирани доколку ситуацијата ескалира.
Израел тврди дека убил припадници на Басиж во Техеран
Израелските одбранбени сили соопштија дека нивните воздушни сили во текот на ноќта во Техеран убиле неколку припадници на паравоената формација Басиж.
Според израелската војска, тие биле погодени на контролни пунктови во главниот град на Иран. Басиж е доброволна паравоена организација лојална на иранските власти, која често се користи за контрола на протестите и за обезбедување на улиците во Техеран.
Од израелската војска наведуваат дека нападите се дел од поширока стратегија за уништување на иранските воени структури и оперативци.
Растат цените на нафтата
Во меѓувреме, цените на нафтата продолжуваат да растат и се приближуваат до 102 долари за барел. Растот е поттикнат од најавите на САД дека ќе продолжат со нападите врз Иран и во следната недела.
Ова се случува и покрај одлуката на Вашингтон делумно да ги ублажи санкциите за руската нафта, што требаше да помогне во стабилизирањето на пазарот.
Напади со дронови во Дубаи
Ирански дронови, според извештаите, ја погодиле финансиската четврт на Дубаи (DIFC), предизвикувајќи материјална штета и вознемиреност кај жителите.
Голем број компании привремено преминале на работа од дома, што дополнително го нарушува деловното функционирање во еден од најважните финансиски центри на Блискиот Исток.
Конфликтот меѓу САД, Израел и Иран продолжува да се шири во регионот, додека дипломатските напори за смирување на ситуацијата засега не даваат резултати.
