Во станбен кварт во Киев денеска беа убиени најмалку шест лица, а 14 се повредени откако вооружен напаѓач отворил оган на улица, потоа зел заложници во супермаркет и бил ликвидиран при полициска акција.
Според украинските власти, нападот се случил во квартот Холосиивски во Киев. Напаѓачот прво пукал кон минувачи на улица, а потоа се забарикадирал во супермаркет, каде држел заложници. Украинската полиција преговарала со него околу 40 минути, по што специјалните сили влегле во објектот. За време на акцијата, осомничениот пукал кон полицаец, а потоа бил убиен.
Украинскиот претседател Володимир Зеленски соопшти дека се спасени четворица заложници, но дека меѓу жртвите има и лице убиено внатре во маркетот. Градоначалникот Виталиј Кличко изјави дека најмалку 10 лица се хоспитализирани, додека вкупниот број повредени изнесува 14.
Главниот обвинител Руслан Кравченко изјавил дека осомничениот бил 58-годишен маж роден во Москва, со криминално досие, а според првичните информации користел автоматско оружје кое било легално регистрирано. Властите го истражуваат случајот како терористички чин.
